حذرنا
الكبار - واحنا لسه عيال - من خطورة ان نصبح (عيال صايعة)، فعندما تتأخر فى العودة إلى المنزل
بعد المدرسة يتم إستقبالك بسؤال (كنت فين يا صايع لحد
دلوقتى)، و عندما يكون الزرار العلوى للقميص مفتوحا (ماتفتحش صدرك زى العيال الصايعة)، و كان هناك
ارتباطا وثيقا بين الصياعة و التدخين و الوقوف على النواصى و معاكسة البنات
ووضع الايدى فى الجيوب أثناء الكلام مع الأب و شرب القهوة ومتابعة المشاهد
الساخنة فى الافلام والكلام فى التليفون بالساعات و الرد على الكبار
بأسلوب غير مهذب و التزويغ من المدرسة والرسوب فى نهاية العام و ارتداء
القميص على اللحم.
وكان لقب (صايع) لقبا مخيفا نهرب منه (وهو الواحد ايه غير سمعة و شوية
حاجات فوق بعض)، و كنا نحرص على الإبتعاد عن اى شخص يحمل لقب (صايع) علشان
الواحد (مايتشبهش).
ولكن بمرور الوقت حدثت طفرة، لم تعد كلمة صايع شتيمة، بل أصبحت وساما يضعه
الآخرون على صدر كل من يحوز إعجابهم،ولم يعد الصايع هو الشخص (اللى مش
متربى قليل الأدب اللى بيسقط دايما و قاعد طول النهار على النت و بيعلى
صوته على أهله و بيسرق فلوس من ورا أهله علشان يجيب بيها سجاير)، هذا الشخص
مابقاش إسمه (صايع) بقى إسمه (مغفل).
واصبح الشخص الصايع هو الشخص الناجح القادر على إثارة إعجاب الناس من حوله،
الشخص القادر على إنتزاع تصفيقهم، و اصبح (الصايع) هو النموذج و القدوة
والمثل الأعلى أحيانا.
ولقب (صايع) لم يعد ايضا مقصورا على الاشخاص فقط، فهناك اشياء كثيرة ممكن
تقول عليها صايعة،
جهاز الموبايل اللى فيه كل الإمكانيات اللى محتاجها واللى بتحلم بيها..يبقى
موبايل صايع.
ممكن تلاقى جون (صايع) عبارة عن جملة بين 3 لاعبين سريعة ورشيقة وغير
متوقعة.
ممكن تلاقى بوستر لألبوم لمطرب متصمم بطريقة صايعة
و محطوط فى حتة صايعة ، ممكن تشوف فيلم نهايته غير متوقعة ولم تمر فى
خيالك تبقى نهاية صايعة والسيناريست اللى كتب الفيلم سيناريست صايع.
وممكن تلاقى بلد يتقال عليها (بلد صايعة) زى
الصين اللى قدرت إنها تخترق مصر بمنتاجاتها و يبقالها فى كل بيت مصرى 20
منتج على الأقل، وبالتالى يمكنك أن تقول أن (الصينين
دول صايعين قوى).
لم يعد لقب صايع مزعجا مثل لقب (عنده إيدز)، ولكن صايع أصبحت وسام شرف مساو
فى قوته لوسام ال(iso 9001) ، ولا أعرف ماذا حدث بالضبط و غير سمعة الكلمة
180 درجة..غالبا هيا دى الصياعة!
أستطيع الآن - و أنا ضميرى مستريح - أن أشجعك على أن تكون (صايع) بالمعنى
الجديد للكلمة
للصياعة بمفهومها الجديد آدابا يجب الإلتزام بها حتى
تستحق اللقب:
1- الصايع عمره ما يقول على نفسه أنا صايع، عمرك شفت واحد ذكى ماشى يقول
للناس(أنا ذكى يا جماعة)؟
2- الصايع يكره الفهلوة، لإن الفهلوة سرقة و مجرد إستغفال للناس ، الصايع
يحترم ذكاء الآخرين.
3- الصياعة تعتمد على الثقافة العامة فى كل المجالات، يكفيك أن تعرف (حاجة عن كل حاجة).
4- الحظ قد يقودك إلى القمة، و الصياعة أن تحافظ عليها.
5- الصياعة إن بالك يبقى طويل ، وماتبدأش بالغلط، وماتردش على اللى بيستفزك
، و إنك تسامح الشخص اللى تقدر تنتقم منه بسهولة.
6- الصياعة إنك ماتكررش نفس الغلطة مرتين.
7- الصياعة إنك تدى كل واحد حقه ، وتعرف قيمة اللى قدامك بالضبط.
8- الصياعة إنك تبقى فاهم كويس إنه....
الثلاثاء ديسمبر 28, 2010 11:49 pm